விளையாட்டு

        விளையாட்டு

வண்ணக் கலவைகொண்ட மேகம்
வந்தே மறைந்து செல்லும் வெய்யோன்
கண்ணைக் கூசும் ஒளிவெள்ளம்
காற்றில் பறந்து செல்லும் குருவி
விண்ணைக் குனிய வைக்கும் வையம்
விந்தை இவைஇணையும் எல்லை
மண்ணில் மரங்கள் மறைகூட்டம்
மகிழ்வில் இயற்கை விளையாட்டே

பொன்னை உரித்த வண்ண மதியைப்
பின்னால் ஒழித்து வைக்கும் மேகம்
என்னை விடென்று நிலவோடும்
இன்னோர் முகிலும் அதை மோதும்
முன்னே உயர்ந்த பனை மரத்தின்
முகத்துள் மறைந்து விளையாடும்
தன்னை மறந்து பனை ஆடும்
திங்கள் சிரித்து வான் ஓடும்

காலை வரையொளி விண்மீன்கள்
கண்கள் சிமிட்டி விளையாடும்
சோலை மலர்களுடன் வண்டும்
செழித்த பூவின் மணம் கொள்ளும்
மாலைத் தென்றல் மனம்மயக்கும்
மரங்கள் அணைப்பில் கிளுகிளுக்கும்
கோலம் அனைத்தும் விளையாட்டே
கொள்ளும் இயற்கைமகள் குணமே

நீரை உயர்த்திக் கரந் தூக்கி
நிமிர்ந்த கணம் குலைய வீழ்ந்து
பாரைப் பெரிதும் தனதாட்சி
பக்கம் சூழ்ந்து செய்யும் ஆழி
ஊரைப் பார்க்க வரும் ஒருநாள்
உள்ள தனைத்தும் அள்ளி யோடும்
வேரை தறித்த மரம் போலும்
வாழ்வை யழித்து விளையாடும்

தூரக் கனத்த ஒலி உறுமும்
தோன்றும் ஒளி வெடித்து மின்னும்
வாரி யடித்து மழை ஊற்றும்
வந்தே புயலும் அதில்கூடும்
நீரைத் தெளித்து விளயாடும்
நின்றோர் தமைஇழுத்து வீழ்த்தும்
கூரை அழித்து விளையாடிக்
கோலம் கெடுத்த பின்பு போகும்

ஓடித் துரத்தி பிடித்தொருவன்
உள்ளோர் உயிர் பறிக்கும்வேளை
வாடித் துயருறவும் மக்கள்
வருந்தி ஒடும் விளையாட்டு
நாடி நரம்பு களும் அஞ்சி
நடுங்கிப் பதைபதைத்து எங்கும்
தேடித் திரிந் தலைந்து தஞ்சம்
தினமும் காணும் விளையாட்டு!

வேரைத் தமிழ்க் குலத்தின் விழுதை 
வெட்டி யழித்து விளையாட
ஊரைக் கொழுத்தி உயிர்கொல்ல
உடலை நெரித்து புவிகொள்ள
தாரையெனக் குதிக்கும் வெள்ளம்
தரையில் குருதி செல்லும் காட்சி
நேரில் உலகின் விழிகாண
நின்றே இழைக்கும் விளையாட்டோ

ஆவிவிட்டு வெளிஓடும்
ஐயோ என்றலறிச் சாகும்
கூவி அழுத குரல் கேட்கும்
கொல்லும் போது வருமோலம்
நாவில் தமிழ் கதைத்த காலம்
நாட்டைவிடுத்து  உலகோடும்
பாவி இவனும் யமனோடு
பாயும் மறிக்கும் விளையாட்டோ?